شنبه ۳۰ دی ۱۳۹۶ - ۰۸:۰۷
کد خبر43027

تبریزین مشهور انسانلاری
رسام عرب‌زاده ایرانین مشهور خالچا طراحی

New Microsoft Office Publisher Document.jpg

شهریارنیوز: ایران دا و باشقا اولکه لرده رسام عرب زاده آدیلا تانینان سید ابوالفتح زیدی لطیفی مشهور به سید ابوالفتح، ایرانین گورکملی خالچا طراحلاریندان بیریسی ایدی. بونونلا برابر رسام عرب زاده رساملیق، مینیاتور، هئیکل تراشلیق، خالچا توخوما و بویاما ساحه سینده چالیشمیشدیر.

رسام اوشاقلیق چاغیندان، اوز آتاسی، حسین زیدی لطیفی نین یانیندا طرح و بویا ایله تانیش اولدو. اونون آتاسی کمال المکون طلبه سی ایدی. او یئددی یاشینا قدر تبریز ده یاشادی. رسام عرب زاده نین رساملیقدا اولان استعدادی اوز معلیم لرینی حئیرتلندیریردی. او معلم لرینین پرتره لرینی چکه رک، محبوب و مشهور اولد. سونرالار او تبریزین مختلف مدرسه لرینده مینیاتور، ناقیش (گول تیکمه)، موسیقی، تیاتر اویرندی. بو فعالیت لرله برابر آتاسینین ماغازاسیندا بیر قوجا اوستاکارین الی آلتیندا خالچا توخوماغی دا اویرندی. رسام تهرانا کوچدوکدن سونرا چوخ آز امک حاقی ایله بیر سرامیک (کاشی) ماغازاسیندا ایشله دی. آردیجیل ایش اویرنمه، اراده و باشقا هنرلرده قازاندیغی تجربه لر اونون سرامیک طراحلیغیندادا دیرچلمه سینه ندن اولدو. سرامیک ده اولان تبحرو سببی ایله، ایرانین ملی مجلیسینین دووارلارینین کاشی لانماسینی اونا تاپیشیریلدی.

او سیاه قلم رسیم لری یاغلی بویالارلا ائله دوغرولدوردو کی رسم لری شکیله بنزه ییردی. بئله لیکله رسام عرب زاده آغ قارا یاغلی بویا واسیطه سی ایله یئنی رساملیق متدی یاراتدی. او مینیاتوردا دیقت و خلاقیت له ایشلر آپاردی و شعرلردن آلدیغی الهام لارلا دیرلی مینیاتور تابلولاری یاراتدی. او یاراتدیغی مینیاتور تابلولاردان یوسف و زلیخا تابلوسونا اشاره ائتمک اولار. رسامین باشقا ایشلریندن عارف قزوینینین پرتره سینی دیزاین ائتمک ایدی. بو دیزاینین هئیکلی، سونرالار عارف قزوینی نین مزاری اوسته قویولدو.

او ایکینجی دونیا محاربه سینین باشلانیشیندا اوز دوغما یوردونا قاییدیب اورادا خالچا طراحلیغی، گول تیکمه و رساملیق کیلاسلاری قوردو. روسلارین آذربایجانا هجوم ائته سی ایله برابر خالچالیق بازاری کاسادلاشدی. رسام ایسه هر حسا و احساسلی صنعتکار کیمی بو وضعیته دوزه بیلمه یه رک، کاریکاتور چکمه یه اوز گتیردی. او چکدیگی کاریکاتورلاریندا طنز و ساتیریک دیل ایله خالقا شادلیق و ساکین لیک وئره رک اونلارین دردلرینی و مسئله لرینی ده کاریکاتورلاریندا تمثیل ائتمه یه چالیشیردی.

شمسی 40نجی و 50نجی ایللر رسامین طراحلیق و خالچا توخوما هونرلرینین انکشاف دور ایدی. او ایللر بویو زحمت و چالیشمادان و تجربه قازانمادان سونرا بدیع و حیرت ائتدیریجی اثرلر یارادیردی. اونون یاراتدیغی اثر لر ایرانین تارخی و هنری و خالچاا میراثینین دیرلی نمونه لریندن دیر.

رسام عرب زاده تهران دا ایرانین بیرینجی هنری خالچا مکتبینین تملینی قویدو. بونونلا برابر رسام عرب زاده آدلی مدنی و هنری وقفی (بنیاد) دا یاراتدی. او 66 ایل چالیشماسی شرفی مناسبتینه، اوزونون توخودوغو 66 قطعه خالچانی دا بو وقفه تحفه وئردی.

اوستاد رسام عرب زاده 1375نجی شمسی ایلده تهران دا فانی دونیادان گوز یومدو. اونون مزاری تهران بهشت زهراسینین صنعت کارلار قطعه سینده دی.
(دوغوم 1293 ش – تبریز /  اؤلوم 1375 ش تهران)

ارسال نظر