سه‌شنبه ۱۰ بهمن ۱۳۹۶ - ۰۷:۳۱
کد خبر43266

تبریزین مشهور انسانلاری ایله تانیش اولاق:
میرزا علی ثقه الاسلام کیم دیر؟

1526.jpg

شهریارنیوز: تبریزلی میرزا علی ثقه الاسلام، حاج میرزا موسی ثقه الاسلامین بویوم اوغلو، مشروطه انقلابینین آدلیم شهید و عالیم لریندن بیریسی دیر.

او دینی تحصیلاتینی تبریزده بیتیردی سونرا عتبات عالیات دا، زین العابدین مازنداری و باشقا بیر چوخ بؤیوک عالیمین یانیندا تکمیل لشدیردی. ایرانا دؤندوکدن و آتاسینین اؤلوموندن سونرا، مظفرالدین شاه، ولیعهدینین سوزونون اساسیندا، اونا ثقه الاسلام آدینی وئردی.

ثقه الاسلام، ایران و عتبات دا، فقه، اصول، حکمت، کلام، تاریخ، جغرافیا، نجوم، ادبیات، رجال علمی و کتاب شنایلیق اؤیرندی. او تورکجه، فارسجا، عربجه و فرانسیزجادا یازیب، اوخویوب و دانیشا بیلیردی. او تاریخ، کلام و مثنوی ده صاحب نظر ایدی. او متبحر بیر ناطق اولاراق، فلسف و عرفان ساحه سینده ده چالیشمیشدی.

ثقه الاسلام عدالت ایسته مه حرکاتی و سونرالار مشروطه زمانیندا، بو حرکت لرین جدی حامی لریندن ایدی. آذربایجان ایالتی نین ایشه باشلاماسی ایله ، اورا آزادلیق ایسته ین لرین اوجاغی حالینا گلدی. ائله ققه الاسلام ایسه بو اوجاغین حمایت ائدن لریندن اولاراق، «انجمن» درگی سینین یازارلاریندان بیریسی اولدو. اونون ایالتی انجمن ده حضورو، مشروطه چی لره بیر دایاق اولاراق اونلاری گوجلندیریردی. او سید جمال الدین اسدآبادی کیمی، مختلف مذهب و حکومت لرین اولدوغو حالدا، اسلام دونیاسینین اتحادی و مسلمانلارین سیاسی وحدتینه اینانیردی، بونونلا برابر اجتماعی مسئله لره دن ده غافیل دئییلدی.ثقه الاسلامی «لال لار» رساله سینده، اؤز دئدیینه گوره « دیلسیز مشروطه نین دیلیندن، مشروطه چی لر عریضه سی» یازیلاریندا، او مشروطه نین گوجلو دیلی ایدی و مشروطه نی نجف اشرف عالیم لرینه توضیح وئریب و آچیقلاییردی.

ثقه الاسلام علمی و فنی مرکز لرین دوزنیلمه سی و علم و فن اویرنمه سینی، اؤلکه نین لاپ ضروری احتیاج لاریندان بیلیردی. او داخلی استحصالاتا تاکید ائدرک، کرک سیز و زائد جنس لرین اولکه یه گتیریلمه سی و اولکه ثروتینین اولکه دن چیخماسینا سبب اولان  هر طور خارجی تجارته له مخالفت ائدیب، تنقید ائدیردی.

روسلار تبریزه گلدیکدن سونرا، ثقه الاسلام 1290 نجی شمسی ایل (1329 ربیع الاول) نوروز بایرامی حاقیندا تبریز آدلی درگی ده بیر مقاله یازیب، اهالی دن  ایسته دی اوزگه قوشونون تبریزی اشغال اتمه سی سببیندن بو ایل نوروز بایرامی شنلیگی توتماسینلار. ائله بو یازینین نتیجه سینده او ایل تبریزده نوروز بایرامی عزیزلنمه دی. بیر سیرا محقق لر بو مقاله نی ثقه الاسلامین روس لار الی ایله شهید اولماسینین بیر عاملی ساییرلار.

روسلار ثقه الاسلام و باشقا یئددی نفری 1290 نجی شمسی ایلین عاشورا گونونده ، ائله عزاردارلیق ائدن دسته لرین مراسیم لرینین یاخینلیغدا دارا آسدیلار. ثقه الاسلامین مزاری تبریزین مقبره الشعراسیندادیر.

 (دوغوم 1239ش تبریز / شهادت 1290 ش- تبریز

ارسال نظر