شنبه ۲۸ بهمن ۱۳۹۶ - ۰۸:۵۴
کد خبر43707

تبریزین مشهور انسانلاری ایله تانیش اولاق؛
میرزا طاهر خوشنویس تبریزین نسخ یازانی

139306oL.jpg

شهریارنیوز: عبدالرحمان اوغلو میرزا طاهر تبریزی، تبریز شهرینده آنادان اولدو . میرزا طاهر خوشنویس آدی ایله مشهور اولان میرزا طاهر سونرالار آدلیم نسخ یازان لاردان اولدو.

او مکررا قرآن و باشقا مذهبی کیتابلاری خوش خطی ایله تحریر ائده رک، میرزا طاهر خوشنویس آدی ایله مشهورلاشدی. او نسخ دن باشقا نستعلیق و شکسته نستعلیق خط لرینده ده تبحری وار ایدی.


(دوغوم 1267ش – تبریز/ اؤلوم 1355ش – تهران)میرزا طاهرین آدلیم و قالیجی اثرلریندن، بویوک قرآن لا ترجمه سینین خطاط لیغی و فیض الاسلام تفسیرینین خلاصه سی دیر. بو قرآنین متنی نسخ و ترجمه سی نستعلیق خط ایله یازیلیب. او چوخ ساییدا قرآن لارین خطاطلیغیندان باشقا، نهج البلاغه، سجادیه صحیفه سی، منتهی الامال، و معالم الاصول و کفایه الاصول کیمی  علمیه حوزه سینین بیر نئچه درسلیک کیتابینی دا اوز گوزل خطی ایله قلمه آلمیشدیر.

 

طاهر تحصیلاتینی یئددی یاشیندا ایکن اؤز آتاسینین یاننیدا قرآن اوخوماقلا باشلادی. سونرا صرف، نحو و فقه علم لرینی ده اویرندی و خطاطلیغا چوخلو ماراق گوستریب و چوخلو تمرین و تکراردان سونرا اوستادسیز و معلم سیز خطاط لیغین اصول و قایدالارینی اؤیرندی.

 

او 9 یاشیندا بیرینجی خطی کیتابی چاپا وئردی. 1282نجی ایلده بیرینجی قرآن کیتابینین خطاطلیغینی 13 یاشیندا ایکن باشلادی. بو قرآنین یازیلماسی 4 ایل زامان آپاردی. مشروطه انقلاب ایله یاناشی 17 یاشلی میرزا طاهری فیوضات، رشدیه و مموریال مدرسه لرینده خط تعلیمی وئرمک اوچون دعوت ائتدیلر. او اوز طلبه لرینی خطاطلیغا ماراقلاندیرماق اوچون اوزونون آیلیق معاشیندان اونلارا مکافات وئریردی.

 

بو آدلیم نسخ یازان قرآن کریمی مکرر صورت ده تحریر ائده رک، و بونونلا برابر مذهبی کیتابلاری نسخ ائده رک، بو کیتابلارین چوخ سایی دا چاپ اولماسی نتیجه سینده چوخ شهرت قازاندی . 1332نجی ایلده اوستاد شهریارین «حیدر بابایه سلام» منظومه سینی میرزا طاهر خوش نویسین خطی ایله چاپ اولوب و بوتون اؤلکه ده یاییلدی.

 

میرزا طاهر خوش نویس 15 ایل مدتینده، ملی مدرسه لرده خدمت ائتدی، 35 ایل ده رسمی اولاراق تبریز مدرسه لرینده خطاطلیق هنرینی اویرتدی. او 1349نجو شمسی ایلده تهرانا کوچوب، عمرونون سونونا قدر اورادا یاشادی. او 1355نجی ایلده حیاتینی ده ییشدی. میرزا طاهر خوشنویس تهرانین بهشت زهرا مزارلیغیندا توپراغا تاپیشیرلسادا، 29 ایل سونرا یعنی 1384نجی ایلین بهمن آییندا اونون مزاری تبریزین مقبره الشعراسینا کؤچوروله رک، بو مکان دا توپراغا تاپیشیریلدی.

ارسال نظر