چهارشنبه ۱۳ دی ۱۳۹۶ - ۰۹:۴۹
کد خبر42687

تبریزین مشهور انسانلاری؛
جمال ترابی طباطبایی « ایرانین سکه شناسلیق علمی نین آتاسی »

طباطبایی.jpg

شهریارنیوز: اوستاد سید جمال ترابی طباطبایی 1304نجو ایلین یاز فصلینین ایکینجی آیینین بئشینجی گونونده تبریزین میارمیار محله سینده دونیایا گوز آچدی.

 سید جمال ترابی طباطبایی عصریمیزین بویوک سکه شناسللاریندان اولاراق ایران سکه شوناسلیق آتاسی آدینا دا مشهور ایدی.

او 60 ایلدن چوخ ایران و ایسلام سکه لری هابئله آرخئولوژی حاقیندا تدقیقات لار آپاردی. مختلف دورلرده حاکمیت ده اولان ایران حکومت لرین سکه لرینین ییغیب، ثبت ائدیب و تانیماسی، آذربایجان موزه سینین وسایط لرینین پلانلاندیرماسی و ایللر بویو سکه شناسلیق تدریس ائتمک اونون دیرلی ایشلریندن ساییلیردی. اوستاد طباطبایی دن بو موضوعلاردا دیرلی یازیلار الده دی.

او علمی و مدنی چالیشمالاریندا بویوک اوستادلار او جومله دن عباس اقبال آشتیانی، وحیدالملک شیبانی، نصرالله فلسفی، علی اکبر بینا، مجیر شیبانی، پرویز ناتل خانلری، احمد مستوفی، محمد معین، مسعود خان کیهان و محمدباقر هوشیار کیمی اوستادلاردان درس اویرنمیشدی.

اوستادین دونیا سویه سینده سکه شناسلیق تخصص و شهرتی، دونیانین مختلف موزه لری و اولکه لرینده چالیشان محقق لر و تدقیقاتچی لارینین اونا مراجعت ائتمه لرینه سبب اولموشدو. بو حاقدا چوخلو یازیلاشما و ال یازمالار واردیر. بو یازی لار اوستاد ترابی طباطبایی نین، دکتر جرج مایلز نیویورک موزه سینین مودورو،  سلوود ، والتر  هینتس، برت فراگنر، اینگر کریر، ریچارد فرای، هاری فلدمن و گوتفرید هرمان کیمی آدلیم تدقیقاتچی لارلا علاقه و ارتباطلاری گوستریر.

او 60 ایل چالیسمالاری بویونجا مین لرجه سند و تاریخی عکس لری توپلاییب، و مختلف سازمانلار و موسسه لره باغیشلادی.  اوستاد ترابی طباطبایی دن 35 دن آرتیق کیتاب، علمی مقاله سکه شناسلیق و آذربایجانین عامه مدنیتی حاقیندا واردیر. شمسی 1355 ده نشر اولونان  «آغ قویونلو سکه لری و صفوی لرین ایرانداکی وحدت و بیرلیک تمل لری» ایرانین ایل کیتابی سئچیله رک، بو دیرلی مکافاتی الده ائتمیشدیر.

اوستادین آدی ایران اونودولمازلار ایللیک کیتابیندا دا ثبت اولونوبدور. او 1388نجی ایلین مهر آیینین 22نجی گونونده بو دونیادان کوچدو. اوستادین مزاری تبریز وادی رحمتینین صنعتچی لر (هنرمند) بولومونده دیر.
 

(دوغوم 1304 ش – تبریز / اؤلوم 1388 ش – تبریز)